Sumaropnun og dagskrá 2026

Ferðaþjónustan í Dalbæ er tilvalin fyrir einstaklinga og hópa sem vilja njóta fegurðar Snæfjallastrandar og Drangajökuls. Hægt er að bóka gistingu og fara í dagsferðir og er úrval góðra gönguleiða á svæðinu. Einnig er hægt að njóta þar kyrrðar utan alfararleiðar.

Við bjóðum einnig upp á tjaldsvæði og veitingasölu.Tjaldstæði opið frá 17. júní- 31. ágúst.

Veitingasala verður opin frá kl. 12:00-18:00 helgarnar 19.-21. júní, 26.-28. júní. 4.-5.júlí og alla daga frá 11. júlí til og með 16. ágúst.

Fjölskylduhátíð verður um verslunarmannahelgina með leikjum, viðburðum og tónlistaratriðum, nánar augLýst síðar. Sólmyrkvafögnuður verður haldinn 12. ágúst, nánar auglýst síðar. Gistingu þarf að bóka sem fyrst þessa daga. Veitingasala verður opin.

Á svefnlofti er hægt að bóka gistingu fyrir 8 og í sal er gisting í rúmbeddum fyrir 10 manns. Einnig er hægt að gista á dýnum á gólfi í sal. Eitt sérherbergi er með hjónarúmi. Hægt er að leigja rúmfatnað skv. gjaldskrá.

Hægt er að semja við rekstaraðila um að kaupa morgunmat og kvöldmat en einnig geta gestir fengið eldunaraðstöðu utan opnunartíma veitingasölu. Hægt er að fá geymslu fyrir matvöru og nesti í ísskápum. Umsjón bókana á opnunartíma frá 19. júní-16. ágúst er hjá Salbjörgu Engilbertsdóttur salbjorg@holmavik.is eða í síma 8653838.

Gjaldskrá:

• Tjaldstæði á mann 2.000

• Tjaldstæði eftir fyrstu nótt á mann 1.500

• Rafmagn á tjaldstæði 1.750

• Sturta 750

• Þvottur 1 vél 1.500

• Gistipláss á svefnlofti í rúmi (aðgengi að wc,sturtu og eldhúsi) 9.000

• Gistipláss á rúmstæði í sal (aðgengi að wc,sturtu og eldhúsi) 7.500

• Dýnugisting í sal (aðgengi að wc, sturtu og eldhúsi) 5.000

• Gistipláss í hjónarúmi í sérherbergi (aðgengi að wc, sturtu og eldhúsi) 15.000

• Rúmföt fyrir einn þ.e. sæng, koddi, sængurföt og lak 2.500

• Handklæðaleiga 500

• Helgarleiga f. félagsmenn 27.500

• Vikuleiga f. félagsmenn 42.500

Félögum Snjáfjallaseturs og Átthagafélags Snæfjallahrepps gefst kostur á að taka Dalbæ á leigu yfir helgi eða heila viku utan opnunartíma ferðaþjónustu. Helgarleiga er kr. 27.500 fyrir félagsmenn, allt að tíu manns, 13 ára og eldri - frítt fyrir börn. Ein vika kostar 42.500 fyrir félagsmenn, allt að tíu manns, 13 ára og eldri - frítt fyrir börn. Ef fólk vill bæta við einum degi þá greiðist aukagjald, kr. 10.000. Fólk sér um sig sjálft, rúmföt, mat og aðrar nauðþurftir. Aðgangur að eldhúsi er innifalinn.

Ingibjörg Kjartansdóttir tekur við pöntunum utan ferðaþjónustutímans þ.e. fyrir 19.júní og eftir 16. ágúst (gsm 8681964), unidalur34@gmail.com., unidalur34@gmail.com.

Birt með fyrirvara um mögulegar breytingar.

Dagskrá um verslunarmannahelgina og sólmyrkvafögnuður

Fjölskylduhátíð verður um verslunarmannahelgina með leikjum, viðburðum og tónlistaratriðum, nánar augLýst síðar. Sólmyrkvafögnuður verður haldinn 12. ágúst, nánar auglýst síðar. Gistingu þarf að bóka sem fyrst þessa daga. Veitingasala verður opin.

Útgáfur Snjáfjallaseturs

Bækur Snjáfjallaseturs verða á góðum afslætti í Dalbæ í sumar.

Minningarrit um Jón Hallfreð Ingvarsson

Út er komin hjá Snjáfjallasetri bókin Minningarrit um Jón Hallfreð Ingvarsson. Bókin er 194 blaðsíður að stærð.

Jón Hallfreð Ingvarsson fæddist á Snæfjallaströnd 1921 og lést þar 1945 úr Duchenne vöðvarýrnunarsjúkdómnum.

Í þessu riti eru ljóðmæli eftir Jón Hallfreð Engilbertsson til minningar um föðurbróður hans og nafna.

Einnig skrifa í ritið systkini Jóns Hallfreðs eldri. Engilbert S. Ingvarsson skrifar minningabrot um bróður sinn og Jóhanna S. Ingvarsdóttur skrifar minningabrot sem bera heitið Blóm í brotnum vegg.

Undir Snjáfjöllum
- Önnur bók eftir Engilbert S. Ingvarsson

Komin er út á vegum Snjáfjallaseturs í samstarfi við Sögumiðlun bókin Undir Snjáfjöllum - Önnur bók Engilbert S. Ingvarsson. Í bókinni ,sem inniheldur þættir um búsetu og mannlíf á Snæfjallaströnd, er brugðið upp lýsingu á ýmsum þáttum í félagslífi og lifnaðarháttum fólksins á Snæfjallaströnd við Ísafjarðardjúp á fyrri hluta 20. aldar. Bókin kom fyrst út 2007. Þessi útgáfa bókarinnar inniheldur aukna og endurbætta þætti um búsetu og mannlíf á Snæfjallaströnd og einnig áður óbirta söguþætti. Bókin kostar kr. 4000 frá útgáfunni auk sendingarkostnaðar. Pantanir óskast sendar á netfangið olafur@sogumidlun.is

Æfiágrip Kolbeins í Dal

Komið er út á vegum Snjáfjallaseturs í samstarfi við Sögumiðlun Æfiágrip Kolbeins í Dal með ítarlegum skýringum eftir Engilbert S. Ingvarsson. Kolbeinn Jakobsson var fæddur 13. september 1862 að Tyrðilmýri í Snæfjallahreppi, en ólst upp í Æðey og eru því 150 ár liðin frá fæðingu hans um þessar mundir. Hann var lengi aflasæll formaður, hreppstjóri, oddviti og sýslunefndarmaður í Snæfjallahreppi og bjó lengst af í Unaðsdal og var kenndur við Dal. Fleyg urðu ummæli Magnúsar sýslumanns Torfasonar „kjarkmaður Kolbeinn í Dal“ og hafa ýmsar skýringar verið gefnar á þessu orðatiltæki. Kolbeinn skrifaði æviágrip sitt sem hér birtist á prenti í fyrsta sinn, en hluti þess þar sem fjallað er um Bæjadrauginn birtist þó í Vestfirskum sögnum árið 1946. Helgi Hjörvar hóf lestur handrits Kolbeins í Ríkisútvarpið á 5. áratugnum en lestrinum var hætt eftir tvo lestra. Allt orðalag og ritháttur er haft að hætti Kolbeins. Bókin kostar kr. 3000 frá útgáfunni auk sendingarkostnaðar. Pantanir óskast sendar í netfangið olafur@sogumidlun.is

Fágætar plöntur á Snæfjallaströnd

Snjáfjallasetur hefur gefið út ritið Fágætar plöntur á Snæfjallaströnd eftir Hörð Kristinsson grasafræðing með ágripi á ensku eftir Ian Watson. Eftir að byggð lagðist af á Snæfjallaströnd hefur gróður tekið við sér og þar vaxa margar fágætar plöntur eins og Þúsundablaðarósin. Fæst í nokkrum helstu bókaverslunum, hjá Ferðafélagi Íslands og hjá útgefanda.

Drangajökull – náttúra og mannlíf

Snjáfjallasetur hefur gefið út ritið Drangajökull – náttúra og mannlíf. Þar er gerð grein fyrir sérstöðu Drangajökuls og breytingum á honum í gegnum tíðina, leiðum yfir jökulinn, aðdráttum yfir hann fyrr á tímum og lífríki og jarðfræði svæðisins. Helgi Björnsson jöklafræðingur á raunvísindastofnun Háskóla Íslands og Haukur Jóhannesson jarðfræðingur hjá Íslenskum orkurannsóknum eiga greinar í ritinu. Einnig Oddur Sigurðsson jöklafræðingur á Veðurstofu Íslands og Eyþór Einarsson, grasafræðingur hjá Náttúrufræðistofnun Íslands, sem fjallar um plöntur á jökulskerjunum og sérstæða flóru Snæfjallastrandar, en Eyþór hefur hvergi birt þessar rannsóknir sínar áður. Ritið um Drangajökul fæst í nokkrum helstu bókaverslunum, hjá Ferðafélagi Íslands og hjá útgefanda.

Hér má sjá sýninguna um Drangajökul (pdf).

Útgáfur Snjáfjallaseturs

Útgáfur Snjáfjallaseturs eru til sölu í Dalbæ, en fást einnig sendar gegn póstkröfu. Félagsmenn njóta 20% afsláttar frá útsöluverði sem er sem hér segir: Híbýli og húsbændur á Snæfjallaströnd 1930-1940 eftir Engilbert Ingvarsson, kr. 2.000; Krafturinn í ánni – Snæfjallaveita og rafvæðing Inndjúps eftir Helga M. Sigurðsson, kr. 1.500; Heyrði ég í hamrinum – kveðandi og þjóðlegur fróðleikur kvenna úr Snæfjalla- og Grunnavíkurhreppum hinum fornu, geisladiskur, kr. 2000. Kver um skólahald kostar kr. 700 og kver sem fylgir sýningunni Horfin býli og huldar vættir er til á ensku og kostar kr. 700.